విశాఖపట్నం, (బి2బి న్యూస్): వాల్టేర్ డివిజన్లో 2025–26 ఆర్థిక సంవత్సరంలో అత్యుత్తమ ప్రతిభ కనబరిచిన టికెట్ తనిఖీ సిబ్బందిని డివిజనల్ రైల్వే మేనేజర్ (డిఆర్ఎం) లలిత్ బోహ్రా ఘనంగా సత్కరించారు. సీనియర్ డివిజనల్ కమర్షియల్ మేనేజర్ కె. పవన్ కుమార్ సమక్షంలో జరిగిన ఈ కార్యక్రమంలో సిబ్బంది అంకితభావాన్ని ఆయన కొనియాడారు.
వాల్టేర్ డివిజన్ టికెట్ తనిఖీ బృందం ఈ ఏడాది ప్రయాణ ఛార్జీలు, జరిమానాల రూపంలో మొత్తం ₹26.21 కోట్ల ఆదాయాన్ని ఆర్జించింది. ఇది గత సంవత్సరంతో పోలిస్తే 3.05% వృద్ధిని నమోదు చేయడం విశేషం. స్టేషన్ సిబ్బంది, స్క్వాడ్ బృందాల సమన్వయంతోనే ఈ అద్భుత ఫలితాలు సాధ్యమయ్యాయని రైల్వే అధికారులు పేర్కొన్నారు.
విధి నిర్వహణలో విశిష్ట ప్రతిభ కనబరిచిన పలువురు సిబ్బందికి డీఆర్ఎం అవార్డులు అందజేశారు. వై. అప్పల రాజు (TTI/విజయనగరం): 850కి పైగా కేసులను గుర్తించి, ₹50.20 లక్షల జరిమానాలను వసూలు చేసి డివిజన్లోనే అగ్రస్థానంలో నిలిచారు. శ్రీమతి కె. సంతోషి రావు, శ్రీమతి సంబిలి, పి.వి. త్రివిక్రమ రావు తదితరులు తమ అద్భుత పనితీరుకు గాను సత్కారం పొందారు.
ఈ సందర్భంగా డీఆర్ఎం లలిత్ బోహ్రా మాట్లాడుతూ.. టికెట్ తనిఖీ సిబ్బంది చూపిస్తున్న క్రమశిక్షణ, నిబద్ధత రైల్వే శాఖకు గర్వకారణమని అన్నారు.
ప్రయాణికులకు మెరుగైన సేవలు అందిస్తూనే, ఆదాయ వృద్ధిలో కీలక పాత్ర పోషిస్తున్న ప్రతి ఒక్కరినీ ఆయన అభినందించారు. ఈ ప్రదర్శన ఇతర సిబ్బందికి ప్రేరణగా నిలుస్తుందని ఆయన ఆకాంక్షించారు.
