ప్రతి పౌరుడికి డిజిటల్ హెల్త్ ప్రొఫైల్ రూపకల్పన: డీఎంహెచ్‌ఓ డాక్టర్ పి.జగదీశ్వర రావు
విశాఖపట్నం, అక్టోబర్ 16: రాష్ట్ర ప్రభుత్వం ప్రతిష్టాత్మకంగా అమలు చేయనున్న ‘సంజీవని’ పథకం ద్వారా ప్రజలందరికీ ఇంటి వద్దనే నాణ్యమైన వైద్య సేవలు అందించడమే ప్రధాన లక్ష్యమని విశాఖపట్నం జిల్లా వైద్య ఆరోగ్య శాఖాధికారి (డీఎంహెచ్‌ఓ) డాక్టర్ పి. జగదీశ్వర రావు స్పష్టం చేశారు. డిసెంబర్ 10వ తేదీ నుంచి అన్ని ప్రాథమిక, పట్టణ ప్రాథమిక ఆరోగ్య కేంద్రాల (PHC/UPHC) పరిధిలో ఈ సేవలు పూర్తిస్థాయిలో అందుబాటులోకి వస్తాయని ఆయన ప్రకటించారు.
శుక్రవారం విశాఖపట్నంలోని ప్రభుత్వ ఛాతీ, అంటువ్యాధుల ఆసుపత్రి (టీబీ ఆసుపత్రి) ప్రాంగణంలో ఉత్తరాంధ్ర, పరిసర జిల్లాల వైద్యాధికారులకు "సంజీవని ఛాంపియన్స్" శిక్షణా కార్యక్రమం ఘనంగా నిర్వహించారు.
ఈ సందర్భంగా డాక్టర్ జగదీశ్వర రావు మాట్లాడుతూ:
ముందస్తు వ్యాధి నివారణ: ప్రజలు తీవ్ర రోగాల బారిన పడకుండా ముందస్తుగా గుర్తించేందుకు ఉచిత స్క్రీనింగ్, వైద్య పరీక్షలు నిర్వహిస్తారు.
డిజిటల్ హెల్త్ ప్రొఫైల్: ప్రతి పౌరుడి సమగ్ర ఆరోగ్య వివరాలతో కూడిన ప్రత్యేక డిజిటల్ హెల్త్ ప్రొఫైల్ రూపొందించి, తదుపరి వైద్య పర్యవేక్షణ సులభతరం చేస్తారు.
గడప వద్దకే వైద్యం: ఆసుపత్రులకు రాలేని నిస్సహాయులు, వృద్ధులకు ఇంటి వద్దకే వెళ్లి నేరుగా పరీక్షలు, మందులు అందిస్తారు.
హాజరైన ఉన్నతాధికారులు, ప్రముఖులు: ఈ కార్యక్రమంలో టాటా గ్రూప్ మేనేజింగ్ డైరెక్టర్ డాక్టర్ శ్రీకాంత్ మరియు వారి సాంకేతిక బృందం పాల్గొని కార్యక్రమ అమలుపై సూచనలు చేశారు. రాష్ట్ర నోడల్ అధికారి శ్రీమతి సృజన, విశాఖ జిల్లా నోడల్ అధికారి డాక్టర్ బి. ఉమావతి, అసిస్టెంట్ మలేరియా అధికారి బి. నాగభూషణంలతో పాటు విశాఖపట్నం, అనకాపల్లి, అల్లూరి సీతారామరాజు (పాడేరు), పోలవరం, శ్రీకాకుళం, విజయనగరం, పార్వతీపురం మన్యం జిల్లాల డీఎంహెచ్‌ఓలు, డీపీఎంఓలు, జిల్లా ప్రోగ్రామ్ అధికారులు, ఆరోగ్య సిబ్బంది పాల్గొన్నారు.
