రాజమహేంద్రవరం, జూలై 16: తూర్పు గోదావరి జిల్లా వ్యాప్తంగా మత్తు పదార్థాల నిర్మూలనకు చేపట్టిన ప్రత్యేక కార్యక్రమాల్లో భాగంగా బొమ్మూరు పోలీస్ స్టేషన్ పరిధిలోని శాటిలైట్ సిటీలో గంజాయి నివారణ, అవగాహన కార్యక్రమాన్ని గురువారం నిర్వహించారు.
జిల్లా ఎస్పీ శ్రీ డి. నరసింహ కిశోర్, ఐపీఎస్ ఆదేశాల మేరకు నిర్వహించిన ఈ కార్యక్రమంలో దక్షిణ విభాగ డీఎస్పీ శ్రీమతి ఎ. శివప్రియ ముఖ్య అతిథిగా పాల్గొన్నారు. ఈ సందర్భంగా ఆమె మాట్లాడుతూ, గంజాయి వంటి మత్తు పదార్థాల వినియోగం యువత భవిష్యత్తును నాశనం చేయడంతో పాటు కుటుంబాలు, సమాజం, దేశ అభివృద్ధిపై తీవ్ర ప్రతికూల ప్రభావం చూపుతుందని అన్నారు. మత్తు వ్యసనానికి బానిసైన వారు ఆరోగ్యపరంగా, మానసికంగా, ఆర్థికంగా తీవ్ర నష్టాలను ఎదుర్కొనే పరిస్థితి ఏర్పడుతుందని తెలిపారు.
బొమ్మూరు పోలీస్ స్టేషన్ ఇన్స్పెక్టర్ శ్రీ పి. కాశీ విశ్వనాథం మాట్లాడుతూ, గంజాయి సాగు, నిల్వ, రవాణా, విక్రయం, వినియోగం ఎన్డీపీఎస్ చట్టం ప్రకారం శిక్షార్హమైన నేరమని స్పష్టం చేశారు. మత్తు పదార్థాలకు సంబంధించిన నేరాల్లో పాల్గొనే వారిపై కఠిన చర్యలు తీసుకుంటామని హెచ్చరించారు. యువత మత్తు పదార్థాలకు దూరంగా ఉండి విద్య, ఉపాధి, మంచి భవిష్యత్తుపై దృష్టి సారించాలని సూచించారు.
పోలీసు అధికారులు ప్రజలకు గంజాయి, ఇతర మత్తు పదార్థాల వల్ల కలిగే శారీరక, మానసిక, సామాజిక, ఆర్థిక దుష్పరిణామాలపై అవగాహన కల్పించారు. పరిసర ప్రాంతాల్లో గంజాయి విక్రయం, రవాణా, నిల్వ, వినియోగం లేదా ఇతర అనుమానాస్పద కార్యకలాపాలు గమనించిన వెంటనే సమీప పోలీస్ స్టేషన్కు సమాచారం అందించాలని కోరారు. సమాచారం అందించిన వారి వివరాలు పూర్తిగా గోప్యంగా ఉంచుతామని హామీ ఇచ్చారు.
ఈ కార్యక్రమంలో డీఎస్పీ శ్రీమతి ఎ. శివప్రియ, ఇన్స్పెక్టర్ శ్రీ పి. కాశీ విశ్వనాథం, బొమ్మూరు పోలీస్ స్టేషన్ సబ్ ఇన్స్పెక్టర్లు, పోలీసు సిబ్బంది, స్థానిక ప్రజాప్రతినిధులు, యువత, మహిళలు, స్థానిక ప్రజలు పెద్ద సంఖ్యలో పాల్గొన్నారు. కార్యక్రమం చివరలో "డ్రగ్స్కు దూరంగా ఉండండి – ఆరోగ్యకరమైన, సురక్షితమైన సమాజ నిర్మాణానికి పోలీసులతో కలిసి ముందుకు సాగండి" అనే సందేశాన్ని ప్రజలకు అందించారు.
