కోసిగి మండలం పరిధిలోని సాతనూరు గ్రామంలో జమాత్ మరియు వక్ఫ్ బోర్డు కమిటీ ఆధ్వర్యంలో మిలాద్-ఉన్-నబీ (ప్రవక్త మహమ్మద్ జన్మదినోత్సవం) వేడుకలను భక్తిశ్రద్ధలతో ఘనంగా నిర్వహించారు.
ఈ సందర్భంగా గ్రామ వీధుల్లో ముస్లిం సోదరులు భారీ ర్యాలీ నిర్వహించి, ప్రవక్త మహమ్మద్ బోధించిన శాంతి, దయ, కరుణ, సోదరభావం వంటి సందేశాలను ప్రజలకు చాటిచెప్పారు. అనంతరం గ్రామంలోని మసీదుల్లో దేశంలో శాంతి, సౌభ్రాతృత్వం, ప్రజల సుఖసంతోషాలు వర్ధిల్లాలని ప్రత్యేక ప్రార్థనలు (దువా) నిర్వహించారు.
ఈ సందర్భంగా జమాత్ మరియు వక్ఫ్ బోర్డు కమిటీ సభ్యులు మాట్లాడుతూ, ప్రవక్త మహమ్మద్ చూపిన ప్రేమ, దయ, క్షమాగుణం, సోదరభావం ప్రతి ఒక్కరికీ ఆదర్శమని, ఆయన చూపిన మార్గంలో నడవాలని పిలుపునిచ్చారు. వేడుకల అనంతరం భక్తులకు మరియు గ్రామ ప్రజలకు అన్నదాన కార్యక్రమాన్ని నిర్వహించారు.
ఈ కార్యక్రమంలో జమాత్, వక్ఫ్ బోర్డు కమిటీ ప్రతినిధులు, గ్రామ పెద్దలు, యువకులు, అలాగే పెద్ద సంఖ్యలో ముస్లిం సోదరులు పాల్గొన్నారు.
