రైల్వే పరిధిలో భద్రత, సమయపాలన, మౌలిక వసతుల పనులపై జీఎం సమీక్ష

దక్షిణ కోస్తా రైల్వే పరిధిలో భద్రత, సమయపాలన, మౌలిక వసతుల పనులపై జీఎం సమీక్ష

విశాఖపట్నం: దక్షిణ కోస్తా రైల్వే పరిధిలో రైళ్ల రాకపోకల్లో భద్రత, సమయపాలన పాటించడంతో పాటు కీలక మౌలిక సదుపాయాల ప్రాజెక్టులను త్వరితగతిన పూర్తి చేయాలని జనరల్ మేనేజర్ శ్రీ సందీప్ మాథుర్ అధికారులను ఆదేశించారు. బుధవారం ఆయన వివిధ విభాగాల అధిపతులు (PHODs), నాలుగు డివిజన్ల డివిజనల్ రైల్వే మేనేజర్లతో (DRMs) ముఖ్యమైన సమీక్షా సమావేశం నిర్వహించారు.

ఈ సమావేశంలో జోన్ పరిధిలో ప్రధాన ప్రాజెక్టుల పురోగతిపై వివరంగా చర్చించారు: లెవెల్ క్రాసింగ్ గేట్ల మూసివేత: ప్రమాదాల నివారణకు లెవెల్ క్రాసింగ్ (LC) గేట్లను మూసివేసి, ప్రత్యామ్నాయ మార్గాలను వేగవంతంగా అందుబాటులోకి తీసుకురావాలని జీఎం స్పష్టం చేశారు.

 ROB/RUBల నిర్మాణం: రైల్వే ఓవర్ బ్రిడ్జిలు (ROB), రైల్వే అండర్ బ్రిడ్జిల (RUB) నిర్మాణ పనుల పురోగతిపై సమీక్షించారు. అధికారులందరూ సమన్వయంతో పనిచేస్తూ, సమస్యలను పరిష్కరించి ఈ ప్రాజెక్టులను వేగంగా పూర్తి చేయాలని ఆదేశించారు.

 ప్లాన్ల సత్వర ఆమోదం: ఇంజనీరింగ్ స్కేల్ ప్లాన్స్ (ESP), సిగ్నలింగ్ ఇంటర్లాకింగ్ ప్లాన్స్ (SIP) క్లియరెన్స్‌లను నిర్ణీత గడువులోగా పూర్తి చేయాలని, దీనివల్ల పనుల ప్రారంభం మరియు కమిషనింగ్ ఎలాంటి ఆలస్యం లేకుండా సాగుతుందని పేర్కొన్నారు.

అన్ని డివిజన్లలో ప్రాజెక్టులను నిర్దేశిత కాలపరిమితిలోగా పూర్తి చేసేలా కఠిన పర్యవేక్షణ ఉండాలని అధికారులకు జీఎం సందీప్ మాథుర్ దిశా నిర్దేశం చేశారు.