QVSE యాప్ పేరుతో భారీ సైబర్ మోసం.. రోడ్డున పడ్డ బాధితులు
ముఖ్యాంశాలు:
- రెండేళ్లుగా సాగుతున్న భారీ ట్రేడింగ్ దాందా గుట్టురట్టు.
- డాలర్ల ఆశ చూపి లక్షలాది రూపాయలు కాజేసిన మోసగాళ్లు.
- ఆకస్మాత్తుగా క్లోజ్ అయిన యాప్.. నిలిచిపోయిన విత్ డ్రా (Withdraw) ఆప్షన్.
వివరాల్లోకి వెళితే:
"డాలర్ల రూపంలో ఆదాయం.. రోజువారీ ట్రేడింగ్తో బోలెడు లాభాలు" అంటూ నమ్మబలికి సామాన్యుల సొమ్మును ఆవిరి చేసిన మరో భారీ సైబర్ మోసం వెలుగులోకి వచ్చింది. QVSE అనే యాప్ పేరుతో గత రెండేళ్లుగా సాగుతున్న ఈ ఘరానా మోసంలో వేలాది మంది తమ కష్టార్జితాన్ని కోల్పోయి నడిరోడ్డున పడ్డారు.
కూలి పనులు చేసుకునే వారి నుంచి చిన్న చిన్న ఉద్యోగులు, గృహిణులు, చివరకు ప్రభుత్వ ఉద్యోగుల వరకు ఎవరినీ వదలకుండా ఈ యాప్ నిర్వాహకులు బురిడీ కొట్టించారు. తక్కువ సమయంలో ఎక్కువ లాభాలు వస్తాయనే ఆశతో ఒకరిని చూసి మరొకరు ఈ యాప్లో భారీగా పెట్టుబడులు పెట్టారు.
అప్పులు చేసి.. నగలు తాకట్టు పెట్టి..
బాధితులు ఈ యాప్లో డబ్బులు డిపాజిట్ చేయడానికి దారుణమైన పరిస్థితులను ఎదుర్కొన్నారు. కొందరు అప్పులు చేసి, మరికొందరు ఇంట్లోని బంగారం తాకట్టు పెట్టి, ఇంకొందరు పిల్లల పెళ్లిళ్ల కోసం దాచుకున్న డబ్బులను కూడా తీసి ఈ యాప్లో పెట్టినట్లు తెలుస్తోంది.
ఆకస్మాత్తుగా యాప్ క్లోజ్!
తీరా లక్షలాది రూపాయలు యాప్లో చేరిన తర్వాత, నిర్వాహకులు అసలు స్కెచ్ అమలు చేశారు. ఇటీవల ఆకస్మాత్తుగా యాప్లో లావాదేవీలు ఆగిపోవడమే కాకుండా, ‘విత్ డ్రా’ (Withdraw) ఆప్షన్ పూర్తిగా మాయమైపోయింది. ప్రస్తుతం యాప్ అసలు ఓపెన్ కాకపోవడంతో బాధితుల గుండెల్లో రాయి పడినట్లయింది.
తమ కష్టార్జితం మొత్తం యాప్లోనే ఉండిపోవడంతో, ఇప్పుడు ఏం చేయాలో పాలుపోక బాధితులు బోరున విలపిస్తున్నారు. ఈ ఘటనపై పోలీసులను ఆశ్రయించేందుకు బాధితులు సిద్ధమవుతున్నారు.
