విశాఖకు పర్యావరణహిత 'గ్రీన్ మెట్రో ఏసీ' బస్సులు: ఆర్టీసీ ఆర్ఎం బి. అప్పలనాయుడు
ఈ నెలాఖరుకు గాజువాక డిపోకు 30 బస్సులు
అక్టోబర్ నాటికి సింహాచలం డిపోకు మరో 50 ఏసీ బస్సులు రాక
ఆధునిక సాంకేతిక పరిజ్ఞానం, ఎయిర్ సస్పెన్షన్ సౌకర్యాలతో రూపకల్పన
విశాఖపట్నం: విశాఖ నగర ప్రజారవాణా వ్యవస్థలో సరికొత్త శకం ప్రారంభం కానుంది. పర్యావరణ పరిరక్షణతో పాటు నగర ప్రయాణికులకు అత్యాధునిక సౌకర్యాలు కల్పించే దిశగా ఏపీఎస్ఆర్టీసీ తొలిసారిగా విశాఖపట్నంలో 'గ్రీన్ మెట్రో లగ్జరీ ఏసీ బస్సుల'ను అందుబాటులోకి తీసుకువస్తోంది. ఇందులో భాగంగా గాజువాక డిపోకు తొలి విడతగా చేరిన సరికొత్త గ్రీన్ మెట్రో ఏసీ బస్సును ఆర్టీసీ విశాఖపట్నం రీజనల్ మేనేజర్ (ఆర్ఎం) బి. అప్పలనాయుడు గురువారం పరిశీలించారు. బస్సులోని సాంకేతిక అంశాలు, ప్రయాణికుల రక్షణ ఏర్పాట్లను అధికారులతో కలిసి స్వయంగా తనిఖీ చేశారు.
ఈ సందర్భంగా ఆర్ఎం బి. అప్పలనాయుడు మాట్లాడుతూ, పర్యావరణహిత ప్రజా రవాణాను ప్రోత్సహించడంలో భాగంగా విశాఖ జిల్లాకు అత్యధిక ప్రాధాన్యం ఇస్తున్నట్లు తెలిపారు. ఈ నెలాఖరు నాటికి గాజువాక డిపోకు మొత్తం 30 గ్రీన్ మెట్రో బస్సులు చేరుకుంటాయని వెల్లడించారు.
వీటితో పాటు మరో 50 ఏసీ బస్సులు అక్టోబర్ నెలాఖరు నాటికి సింహపురి (సింహాచలం) డిపోకు రానున్నట్లు చెప్పారు. రిజిస్ట్రేషన్ ప్రక్రియ, రూట్ అనుమతులు పూర్తయిన వెంటనే నగరంలోని రద్దీ రూట్లలో వీటిని ప్రజలకు అందుబాటులోకి తీసుకొస్తామని పేర్కొన్నారు.
బస్సుల్లో అత్యాధునిక సౌకర్యాలు:
సీటింగ్ & సామర్థ్యం: బస్సులో 35 మంది కూర్చునే సౌకర్యంతో పాటు, పీక్ అవర్స్లో రద్దీని తట్టుకునేలా నిలబడి ప్రయాణించేందుకు తగినంత స్థలాన్ని కేటాయించారు.
భద్రత: మహిళలు, సాధారణ ప్రయాణికుల భద్రత దృష్ట్యా బస్సు లోపల 4 అత్యాధునిక సీసీ కెమెరాలు, సెన్సార్లతో కూడిన ఆటోమేటిక్ డోర్లను ఏర్పాటు చేశారు.
సౌకర్యవంతమైన జర్నీ: గుంతల రోడ్లపై కూడా కుదుపులు తెలియకుండా ఉండేందుకు ప్రత్యేక ఎయిర్ సస్పెన్షన్ వ్యవస్థను అమర్చారు.
ఈ కార్యక్రమంలో గాజువాక డిపో మేనేజర్ పి. మల్లేశ్వరరావు, అసిస్టెంట్ ఇంజనీర్ నాగభూషణ్, తయారీ సంస్థ పినాకిల్ ప్రతినిధి త్రినాథ్, గ్రీన్ సెల్ ఇంజనీర్ హరిబాబుతో పాటు టెక్నికల్ ఇంజనీర్లు, మెకానిక్ విభాగం సిబ్బంది పాల్గొన్నారు.
