VAS పోస్టుల భర్తీపై అవాస్తవ ప్రచారం తగదు: పశుసంవర్ధక శాఖ స్పష్టత
విజయవాడ, సెప్టెంబర్ 18: పశుసంవర్ధక శాఖలో వెటర్నరీ అసిస్టెంట్ సర్జన్ (VAS) పోస్టుల భర్తీ ప్రక్రియపై సామాజిక మాధ్యమాల్లో ప్రచారమవుతున్న వార్తల్లో నిజం లేదని పశుసంవర్ధక శాఖ స్పష్టం చేసింది.
ఈ మేరకు పశుసంవర్ధక శాఖ ఇన్చార్జ్ డైరెక్టర్, అదనపు సంచాలకులు (ఆరోగ్యం) డాక్టర్ రజని కుమారి ఒక ప్రకటన విడుదల చేశారు. ప్రభుత్వం ఇటీవల విడుదల చేసిన 164 వెటర్నరీ అసిస్టెంట్ సర్జన్ పోస్టుల భర్తీకి సంబంధించి కొంతమంది అర్హులైన అభ్యర్థులు శుక్రవారం నాడు విజయవాడలోని డైరెక్టరేట్ కార్యాలయానికి వచ్చినట్లు తెలిపారు. వారు జీవో నెం. 24 (G.O.Ms.No.24) ను రద్దు చేసి, గతంలో అమలు చేసిన విధానం ప్రకారం జీవో నెం. 54 (G.O.Ms.No.54) ఆధారంగానే నియామకాలు చేపట్టాలని కోరుతూ వినతిపత్రం అందజేసి నిరసన తెలిపారని పేర్కొన్నారు.
అయితే, కొన్ని సామాజిక మాధ్యమాల్లో "తొలగించిన తమను విధుల్లోకి తీసుకోవాలంటూ ఉద్యోగార్థులు ఆందోళన చేపట్టారు" అని ప్రచురితమైన కథనం పూర్తిగా వాస్తవ విరుద్ధమని ఆమె కొట్టిపారేశారు. అక్కడ జరిగింది కేవలం జీవో నెం. 54 ప్రకారం నియామకాలు చేపట్టాలని కోరుతూ అభ్యర్థులు వినతిపత్రం ఇవ్వడమేనని, ప్రజలు మరియు అభ్యర్థులు ఇలాంటి అసత్య ప్రచారాలను నమ్మవద్దని అధికారులు స్పష్టం చేశారు.
