అత్యవసరమైతే తప్ప బయటకు రావద్దు
వాగులు దాటే ప్రయత్నాలు చేయొద్దు
అరకు వేలి: తుఫాను ప్రభావంతో కురుస్తున్న భారీ వర్షాల నేపథ్యంలో ప్రజలు అప్రమత్తంగా ఉండాలని అరకు వేలి మండలం కాంగ్రెస్ పార్టీ జెడ్పీటీసీ అభ్యర్థి శ్రీమతి పాచిపెంట శాంతకుమారి విజ్ఞప్తి చేశారు. బుధవారం ఆమె ఒక ప్రకటన విడుదల చేస్తూ, మారుమూల గిరిజన ప్రాంతాల్లో వరద ఉధృతి అధికంగా ఉండే అవకాశం ఉన్నందున ప్రజలు అత్యవసరమైతే తప్ప ఇళ్ల నుంచి బయటకు రావద్దని సూచించారు. ఉధృతంగా ప్రవహించే వాగులు, వంకలు, కల్వర్టులను దాటే సాహసం ఎవరూ చేయవద్దని హెచ్చరించారు. ఈదురు గాలుల కారణంగా విరిగిపడే చెట్లు, తెగిపడిన విద్యుత్ తీగల వద్దకు వెళ్లకుండా విద్యుత్ శాఖ అధికారులకు సమాచారం అందించాలన్నారు. కొండచరియలు విరిగిపడే ప్రమాదం ఉన్న వాలు ప్రాంతాలు, మట్టి గోడల సమీపంలో ఉండేవారు తక్షణమే సురక్షిత ప్రాంతాలకు వెళ్లాలని సూచించారు. ఇళ్లలో తాగునీరు, అత్యవసర మందులు, టార్చ్‌లైట్ వంటి సామగ్రిని సిద్ధంగా ఉంచుకోవాలని, వృద్ధులు, గర్భిణులు, చిన్నారుల ఆరోగ్యంపై ప్రత్యేక శ్రద్ధ వహించాలని కోరారు. ఏదైనా అత్యవసర పరిస్థితి తలెత్తితే తక్షణ సహాయం కోసం డయల్ 112 లేదా స్థానిక అధికారులను సంప్రదించాలని ఆమె పేర్కొన్నారు.
