నేషన్ డెవలప్మెంట్ ఫ్రంట్ (NDF)కు మద్దతు ఇవ్వండి
గ్రాడ్యుయేట్, ఉపాధ్యాయ ఎమ్మెల్సీ ఎన్నికల్లో పోటీ చేస్తాం
ఉద్యోగ, ఉపాధ్యాయ, నిరుద్యోగ యువతకు డాక్టర్ పోతుల నాగరాజు పిలుపు
అమరావతి / విశాఖపట్నం: మెరుగైన సమాజ నిర్మాణం, విలువలతో కూడిన రాజకీయాల కోసం చదువుకున్న యువత, విద్యావంతులు ముందుకు రావాలని నేషన్ డెవలప్మెంట్ ఫ్రంట్ (NDF) వ్యవస్థాపకులు డాక్టర్ పోతుల నాగరాజు పిలుపునిచ్చారు. RPS మరియు REF ఆధ్వర్యంలో దాదాపు 214 సంఘాల సమూహంగా ఏర్పడిన NDF, రాష్ట్రంలో జరిగే గ్రాడ్యుయేట్ మరియు ఉపాధ్యాయ ఎమ్మెల్సీ (MLC) ఎన్నికల్లో పోటీ చేయడమే ప్రధాన అజెండాగా పనిచేస్తుందని ఆయన ఒక ప్రకటనలో తెలిపారు.
NDF ప్రధాన అజెండా మరియు డిమాండ్లు ఇవేనని డాక్టర్ పోతుల నాగరాజు పేర్కొన్నారు:
- ఉద్యోగ, ఉపాధ్యాయ సంక్షేమం: ఉద్యోగ, ఉపాధ్యాయుల ఆత్మగౌరవ పరిరక్షణతో పాటు, రాష్ట్రంలో ఖాళీగా ఉన్న ప్రతి ప్రభుత్వ ఉద్యోగాన్ని భర్తీ చేయాలి. కాంట్రాక్ట్, అవుట్ సోర్సింగ్ విధానాలను రద్దు చేసి, ప్రస్తుతం పనిచేస్తున్న వారిని రెగ్యులర్ ఉద్యోగులుగా గుర్తించాలి. నిరుద్యోగ యువతకు ఉద్యోగాన్ని ఒక హక్కుగా కల్పిస్తూ, ఉపాధి అవకాశాలు పెంచాలి.
- విద్యా వ్యవస్థ బలోపేతం: రాష్ట్రంలో మూతపడిన ప్రతి ప్రభుత్వ పాఠశాలను తిరిగి ప్రారంభించి, ప్రతి గ్రామంలో ప్రభుత్వ బడి ఉండేలా చూడాలి. ప్రాథమిక స్థాయి నుంచే ప్రభుత్వ పాఠశాలల్లో ఇంగ్లీష్ మీడియం అమలు చేయాలి. మెడికల్ కాలేజీలను ప్రభుత్వమే నిర్వహించాలి.
- వైద్య సదుపాయాల విస్తరణ: ప్రతి గ్రామంలో ఆరోగ్య కేంద్రం, మండల కేంద్రంలో 100 పడకల ఆసుపత్రి, నియోజకవర్గ కేంద్రంలో 250 పడకల ఆసుపత్రి, జిల్లా కేంద్రంలో 2,000 పడకల సూపర్ స్పెషలిటీ సేవల కేంద్రాన్ని ఏర్పాటు చేయాలి.
- ప్రాంతీయ అభివృద్ధి & సామాజిక న్యాయం: వెనుకబడిన రాయలసీమ, ఉత్తరాంధ్ర ప్రాంతాలను అభివృద్ధి చేయడంతో పాటు అమరావతి అభివృద్ధిలో అందరికీ భాగస్వామ్యం కల్పించాలి. రిజర్వేషన్లను సక్రమంగా అమలు చేస్తూ, బీసీ, ఎస్సీ, ఎస్టీ, మైనారిటీ, కాపు తదితర మెజారిటీ వర్గాలకు అన్ని రంగాలలో వారి జనాభా నిష్పత్తి ప్రకారం వాటా ఇవ్వాలి. ప్రభుత్వ రంగ సంస్థలను పరిరక్షించాలి.
- ఆరోగ్యకరమైన, అవినీతి రహిత సమాజం: ఆంధ్రప్రదేశ్ను గంజాయి, మద్యం రహిత రాష్ట్రంగా తీర్చిదిద్దాలి. పర్యావరణ పరిరక్షణ, మొక్కల పెంపకానికి ప్రాధాన్యత ఇవ్వాలి.
రాజకీయాలలో నైతిక విలువలు, నిజాయితీ పాలన, అవినీతి నిర్మూలన కోసం విద్యార్థులు, యువత, మేధావులు, ఉద్యోగ, ఉపాధ్యాయ సంఘాలు, పెన్షనర్లు, వృత్తి నిపుణులు ఏకం కావాలని ఆయన కోరారు. త్వరలోనే అమరావతి కేంద్రంగా రాష్ట్రంలోని క్రియాశీలక ప్రజా, కుల, ఉద్యోగ, ఉపాధ్యాయ, సీపీఎస్ (CPS), ఎన్జీవో (NGO), రెవెన్యూ, కాంట్రాక్ట్ మరియు అవుట్ సోర్సింగ్ సంఘాల నాయకులతో కలిసి పూర్తి స్థాయి కార్యాచరణను ప్రకటిస్తామని డాక్టర్ పోతుల నాగరాజు స్పష్టం చేశారు.

