విజయవాడ, ఆగస్టు 29: ప్రముఖ కమ్యూనిస్టు నాయకుడు, మార్క్సిస్టు మేధావి తరిమెల నాగిరెడ్డి 50వ వర్ధంతి సభ శనివారం విజయవాడలో నిర్వహించనున్నారు. గవర్నర్పేటలోని ఆకులవారి వీధిలో ఉన్న అమరుడు మాకినేని బసవపున్నయ్య విజ్ఞాన కేంద్రంలో ఈ సభ జరగనుంది.
ఈ కార్యక్రమానికి టీఎన్ మెమోరియల్ ట్రస్ట్ చైర్మన్ ఎస్. ఝాన్సీ అధ్యక్షత వహించనున్నారు. ప్రారంభ ఉపన్యాసాన్ని హైదరాబాద్ సెంట్రల్ యూనివర్సిటీ (HCU) వ్యవసాయ ఆర్థిక శాస్త్రవేత్త, విశ్రాంతి ప్రొఫెసర్ డి. నరసింహారెడ్డి అందించనున్నారు. "తరిమెల నాగిరెడ్డి రాజకీయ-ఆర్థిక దృక్పథం – నేటి భారత వ్యవసాయ సంక్షోభం" అనే అంశంపై ఆయన విశ్లేషణాత్మకంగా ప్రసంగించనున్నారు. అనంతరం తరిమెల నాగిరెడ్డి జీవిత విశేషాలను ప్రతిబింబించే "మ్యాన్ ఆఫ్ ది ఎర్త్" డాక్యుమెంటరీని ధరిత్రి క్రియేషన్స్ ఆధ్వర్యంలో ప్రదర్శించనున్నారు. ఈ సభకు లౌకికవాదులు, ప్రజాస్వామ్యవాదులు, కమ్యూనిస్టు ఉద్యమ కార్యకర్తలు, మేధావులు, ప్రజాసంఘాల ప్రతినిధులు అధిక సంఖ్యలో హాజరై విజయవంతం చేయాలని నిర్వాహకులు విజ్ఞప్తి చేశారు.
