సమాజంలో మార్పు కోసం 'నేషన్ డెవలప్‌మెంట్ ఫ్రంట్ (NDF)' ఆవిర్భావం

212 సంఘాల కలయికతో ఎమ్మెల్సీ ఎన్నికల్లో పోటీ: వ్యవస్థాపకులు డాక్టర్ పోతుల నాగరాజు



అనంతపురం: ఆంధ్రప్రదేశ్ రాష్ట్రంలో సామాజిక మార్పు తీసుకురావడానికి, రాజకీయాలలో విద్యావంతుల భాగస్వామ్యాన్ని పెంచడానికి మరియు ఉద్యోగ, ఉపాధ్యాయుల ఆత్మగౌరవ పరిరక్షణ లక్ష్యంగా 'నేషన్ డెవలప్‌మెంట్ ఫ్రంట్ (NDF)' ఆవిర్భవించిందని ఆ ఫ్రంట్ వ్యవస్థాపకులు డాక్టర్ పోతుల నాగరాజు ప్రకటించారు.



ఆదివారం అనంతపురం జిల్లా కేంద్రంలోని డాక్టర్ బి.ఆర్. అంబేద్కర్, మహాత్మా జ్యోతిరావు ఫూలే విగ్రహాలకు ఆయన పూలమాలలు వేసి ఘనంగా నివాళులర్పించారు. అనంతరం మాట్లాడుతూ, రిజర్వేషన్ల పరిరక్షణ సమితి (RPS) మరియు రిజర్వేషన్ ఎంప్లాయిస్ ఫెడరేషన్ (REF) ఆధ్వర్యంలో బీసీ, ఎస్సీ, ఎస్టీ, మైనారిటీ మరియు కాపు సామాజిక వర్గాల ఐక్యత కోసం NDF పనిచేస్తుందని తెలిపారు. రాబోయే ఆంధ్రప్రదేశ్ గ్రాడ్యుయేట్ మరియు ఉపాధ్యాయ ఎమ్మెల్సీ (MLC) ఎన్నికల్లో తమ ఫ్రంట్ తరఫున అభ్యర్థులు బరిలో ఉంటారని ఆయన స్పష్టం చేశారు.



ఈ నెల 29న విజయవాడలో కార్యాచరణ ప్రకటన: రాష్ట్రవ్యాప్తంగా తమతో కలిసి పనిచేయడానికి సిద్ధంగా ఉన్న ప్రజా సంఘాలు, ఉద్యోగ, ఉపాధ్యాయ, కుల, విద్యార్థి, యువజన సంఘాలు, పెన్షనర్లు, న్యాయవాదులు, ఇతర వృత్తిదారులు, బహుజన విద్యావంతులు, మేధావులు, రచయితలు మరియు సోషల్ మీడియా ప్రతినిధులతో కలిపి మొత్తం 212 సంఘాల సమన్వయంతో NDF ముందుకు సాగుతుందని డాక్టర్ నాగరాజు వివరించారు. ఫ్రంట్ యొక్క పూర్తి స్థాయి అజెండా మరియు భవిష్యత్ కార్యాచరణను ఈ నెల 29న విజయవాడ ప్రెస్ క్లబ్ వేదికగా అధికారికంగా ప్రకటించనున్నట్లు ఆయన వెల్లడించారు. 

పాల్గొన్న నాయకులు: ఈ కార్యక్రమంలో ఆర్పీఎస్ (RPS) నాయకులు పుల్లయ్య, శ్రీనివాసులు, శివకృష్ణ, హరి, రామకృష్ణ యాదవ్; ఆర్ఈఎఫ్ (REF) నాయకులు నారాయణ నాయక్, చింతన్న, ఆంజనేయులు, సురేంద్ర; ఎస్సీ, ఎస్టీ జేఏసీ నేత సాకే శ్రీహరి; బామ్‌సెఫ్ (BAMCEF) ప్రతినిధులు నరసింహమూర్తి, ఆదినారాయణ; ఎస్సీ, ఎస్టీ ఉద్యోగుల నాయకులు జయరాం పాల్గొన్నారు. వీరితో పాటు ఎన్జీవో (NGO), ఉపాధ్యాయ, విద్యార్థి, కుల సంఘాల నాయకులు చంద్రచర్ల హరి, ఎం.డి. నాగభూషణం, రాజేంద్ర, ఏపీటీఎఫ్ (APTF) ప్రభాకర్, కటిక జయరాం, జి. శ్రీనివాసులు, రామకృష్ణ యాదవ్, పెరుగు శివకృష్ణ యాదవ్, కృష్ణ ప్రశాంత్, రుద్రంపేట హరి, అనిల్, మధు, కె. వరప్రసాద్, కుళ్ళాయప్ప, ఈశ్వరయ్య, ఎన్. రాఘవేంద్ర రావు, ఆంజనేయులు, లక్ష్మీనారాయణ, నాగరాజు, రాజా, వజీద్ భాషా తదితరులు హాజరయ్యారు.