వైజాగ్ హాఫ్ మారథాన్‌లో సౌత్ కోస్ట్ రైల్వే అధికారి వినీత్ కుమార్ ప్రతిభ
21.1 కి.మీ మారథాన్‌ను విజయవంతంగా పూర్తి చేసిన పీసీఓఎం
విశాఖపట్నం (ఆంధ్రప్రదేశ్): ఆరోగ్యకరమైన జీవనశైలి, శారీరక దృఢత్వానికి నిదర్శనంగా సౌత్ కోస్ట్ రైల్వే (SCoR) ప్రిన్సిపల్ చీఫ్ ఆపరేషన్స్ మేనేజర్ (PCOM) శ్రీ వినీత్ కుమార్ విశేష ప్రతిభ కనబరిచారు. విశాఖపట్నంలోని గీతం (GITAM) డీమ్డ్ యూనివర్సిటీ వేదికగా వీటీఆర్‌ఏ (VTRA) ఆధ్వర్యంలో నిర్వహించిన ‘డీసీబీ బ్యాంక్ వైజాగ్ హాఫ్ మారథాన్ 2026’లో ఆయన 21.1 కిలోమీటర్ల హాఫ్ మారథాన్‌ను విజయవంతంగా పూర్తి చేశారు.
ఈవెంట్ నిర్వాహకులు వెల్లడించిన అధికారిక తాత్కాలిక సమయం ప్రకారం, శ్రీ వినీత్ కుమార్ 21.1 కిలోమీటర్ల లక్ష్యాన్ని 03:12:19 వ్యవధిలో అధిగమించారు. తద్వారా 21.1 కి.మీ హాఫ్ మారథాన్‌లో పాల్గొని విజయవంతంగా పూర్తి చేసిన తొలి సౌత్ కోస్ట్ రైల్వే అధికారిగా ఆయన అరుదైన ఘనత సాధించారు.
ఆయన చూపిన క్రమశిక్షణ, సహనం, శారీరక దృఢత్వం రైల్వే అధికారులు, ఉద్యోగులకే కాక యువతకు సైతం ఫిట్‌నెస్‌పై స్పూర్తిని నింపుతాయని పలువురు పేర్కొన్నారు. ఈ ఘనత సాధించిన శ్రీ వినీత్ కుమార్‌ను సౌత్ కోస్ట్ రైల్వే ఉన్నతాధికారులు, సిబ్బంది ప్రత్యేకంగా అభినందిస్తూ శుభాకాంక్షలు తెలిపారు.
