ఆదోని, ఆగస్టు 12 (వార్త): ఆదోని నియోజకవర్గ సమగ్ర అభివృద్ధి, ప్రజా సమస్యల పరిష్కారంపై ప్రత్యేక దృష్టి సారించిన ఆదోని శాసనసభ్యులు డా. పి.వి. పార్థసారధి వాల్మీకి బుధవారం ఆదోని ఆర్డీవో కార్యాలయాన్ని సందర్శించి రెవెన్యూ అధికారులతో పలు కీలక అంశాలపై సుదీర్ఘంగా చర్చించారు. ముఖ్యంగా పట్టణ ప్రధాన రహదారుల విస్తరణ, ప్రభుత్వ భూముల పరిరక్షణ, కర్నూలు అర్బన్ డెవలప్మెంట్ అథారిటీ (KUDA) పరిధిలో లేఅవుట్లు, నిర్మాణ అనుమతుల వ్యవస్థను క్రమబద్ధీకరించే అంశాలపై దృష్టి సారించారు.
ఆదోని పట్టణంలో పెరుగుతున్న జనాభా, వాహనాల రద్దీ కారణంగా ట్రాఫిక్ సమస్యలు అధికమవుతున్న నేపథ్యంలో ప్రజల సౌకర్యం, పాదచారుల భద్రతను దృష్టిలో ఉంచుకుని ప్రధాన రహదారులను విస్తరించాల్సిన అవసరం ఉందని ఎమ్మెల్యే పేర్కొన్నారు. పట్టణంలోని 12 ప్రధాన రహదారులను ప్రాధాన్యత ఆధారంగా అభివృద్ధి చేయాలని, ఇందుకు సంబంధించి ఫీల్డ్ ఇన్స్పెక్షన్, సాంకేతిక పరిశీలన, అంచనాల తయారీ, నిధుల సమీకరణ ప్రక్రియలను వేగవంతం చేయాలని అధికారులను కోరారు.
అదేవిధంగా ఎస్.కొండాపురం, ఆదోని రెవెన్యూ గ్రామం, మాండిగేరి గ్రామాల్లోని ప్రభుత్వ భూముల పరిరక్షణపై ప్రత్యేకంగా చర్చించారు. ప్రభుత్వ భూముల ఆక్రమణలను అరికట్టడంతో పాటు తప్పుడు పత్రాల ఆధారంగా హక్కులు పొందే ప్రయత్నాలను కఠినంగా నిరోధించాలని సూచించారు. ఇందుకోసం అడంగల్, 1-బి, ఆర్ఓఆర్, రిజిస్ట్రేషన్ తదితర రెవెన్యూ రికార్డులను సమగ్రంగా పరిశీలించి భూముల వాస్తవ స్థితిని నిర్ధారించాలని ఆదేశించారు.
కర్నూలు అర్బన్ డెవలప్మెంట్ అథారిటీ పరిధిలో లేఅవుట్లు, నాన్-లేఅవుట్ ప్లాట్లు, భూ విభజనలు, భవన నిర్మాణ అనుమతుల విషయంలో నిబంధనలను కచ్చితంగా అమలు చేయాలని ఎమ్మెల్యే సూచించారు. భూమి యాజమాన్యం, భూమి వర్గీకరణ, లేఅవుట్ అనుమతులు, రహదారుల వెడల్పు, ఓపెన్ స్పేస్లు వంటి అంశాలను సంబంధిత శాఖల ద్వారా పూర్తిస్థాయిలో పరిశీలించిన అనంతరం మాత్రమే అనుమతులు మంజూరు చేయాలని కోరారు. నిబంధనలకు విరుద్ధంగా జరిగే లేఅవుట్లు, అక్రమ నిర్మాణాలు, భూ లావాదేవీల కారణంగా ప్రజలు నష్టపోకుండా అధికారులు అప్రమత్తంగా వ్యవహరించాలని ఎమ్మెల్యే పార్థసారధి సూచించారు. ప్రజా ప్రయోజనాలను దృష్టిలో ఉంచుకుని రహదారుల విస్తరణ, ప్రభుత్వ భూముల పరిరక్షణ, పట్టణ అభివృద్ధికి సంబంధించిన అంశాలపై అధికారులు తక్షణ చర్యలు చేపట్టాలని కోరారు. ఈ చర్యల ద్వారా ఆదోనిలో ట్రాఫిక్ సమస్యలకు పరిష్కారం లభించడంతో పాటు ప్రభుత్వ ఆస్తుల పరిరక్షణ, క్రమబద్ధమైన పట్టణాభివృద్ధి, ప్రజల ఆస్తులకు భద్రత కల్పించవచ్చని ఎమ్మెల్యే డా. పి.వి. పార్థసారధి వాల్మీకి తెలిపారు.
